Për yllin slloven të klubit Dallas Mavericks të NBA, Luka Doncic, është zbuluar se një pjesë e familjes së tij është nga Kosova.
Doncic e ka pushtuar ligën më të famshme në botë për basketboll në sezonin e tij të parë atje, përkundër që është vetëm 19-vjeçar.
Vizioni i ka ndihmuar Doncicit që të jetë një nivel më lart se basketbollistët e tjerë që debutuan këtë sezon në NBA. Ai kishte luajtur deri sezonin e kaluar në Evropë, për Real Madridin.
Doncici është slloven nga nëna, e serb nga babai. Por, në njëfarë forme, ylli i NBA e ka një pjesë të tij edhe nga Kosova. Gjyshi i tij ka lindur në Klinë, më saktë, në fshatin Bincë. Vëllai i tij, pra axha i babës së Llukas ende jeton në Kosovë, njofton Klan Kosova.
19-vjeçari ka statistika mjaft mbresëlënëse këtë sezon në NBA, me mesatarisht 20.8 pikë, 12 kërcime dhe nëntë asiste për ndeshje. Ai vlerësohet se është në rrugë të drejtë për ta fituar çmimin “Rookie of the Year”.