Derisa Radu Albot u bë të dielën tenisti i parë nga Moldavia që fitoi një titull të ATP-së, në vendlindjen e tij në Lindje të Evropës po mbaheshin zgjedhjet parlamentare.
Ndryshe nga katër vjet më parë, kur ishte në Francë për një turne të tenisit dhe kishte shpenzuar 200 dollarë për taksi për të shkuar në Ambasadën Moldave në mënyrë që të mundë të votonte, Albot tregoi se nuk mundi të bënte rrugën për të votuar edhe të dielën.
Kësaj radhe, ai ishte i zënë duke luajtur në finale të turneut “Delray Beach Open”, ku ndali britanikun Dan Evans, të cilin e mposhti me 2:1 në sete (3:6, 6:3 dhe 7:6), duke siguruar pagesën më të madhe në karrierë, 97.490 dollarë.
Albot 29-vjeçar është përfshirë në ATP Tour për më tepër se një dekadë, mirëpo vetëm tash ka nisur të marrë hov. Duke u futur në turneun “Delray Beach Open”, ai ishte në pozitën e 82-të në botë, shumë pranë pozitës më të mirë që ka qenë ndonjëherë – 81, të cilën e kishte mbajtur dy vjet më parë. Me fitoren ndaj Evansit, Albot është ngritur në pozitën e 52-të.
© KOHA. Të gjitha të drejtat janë të rezervuara.