Kosova do të kërkojë gjashtë pikë nga ndeshjet e qershorit, kundër Malit të Zi dhe Bullgarisë.
Por, për të ndodhur kjo, futbollistët duhet të sakrifikohen shumë për skuadrën dhe të japin më të mirën për 180 minuta.
Sulmi do të jetë i ngjashëm sikur në ndeshjet e kaluara; Milot Rashica, Vedat Muriqi dhe Arbër Zeneli do të jenë para – atyre mund t’iu bashkohet edhe Bersant Celina.
Problemi më i madh për Bernard Challandes do të jetë mesfusha. Hekuran Kryeziu, Valon Berisha dhe Herolind Shala, janë zyrtarisht jashtë për këtë ndeshje.
Në mungesë të futbollistëve më lartë, Besar Halimi duket të jetë i padiskutueshëm në mesfushë përpara mbrojtësve, për shkak edhe të përvojës.
Kandidatët e mundshëm për të luajtur përkrah Halimit në mesfushë janë Florent Hasani, Idriz Voca dhe Anel Rashkaj.
Nuk përjashtohet që në mesfushë të luajë edhe prurja e re te Kosova, Florent Hadërgjonaj.
Te Huddersfield Town A.F.C., Hadërgjonaj ka luajtur 12 ndeshje në pozitën natyrale, mbrojtës i djathtë dhe 12 sfida tjera në pozita të ndryshme; mesfushor i majtë, mesfushor i djathtë dhe mesfushor defensivë.
Kështu, nuk përjashtohet mundësia që Bernard Challandes ta përdorë 24-vjeçarin në mesfushë, duke parë mungesat e shumta.
Kosova, fillimisht do t’i matë forcat me Malin e Zi me 7 qershor, e më pas do të përballet me Bullgarinë me 10 qershor. /Gazeta Express/