Trajneri i Liverpoolit, Jurgen Klopp është deklaruar për gjendjen e Mohamed Salah.
Tekniku gjerman ka konfirmuar se Salah nuk do të jetë i gatshëm për sfidën e kthimit ndaj Barcelonës, e cila luhet nesër.
Ylli egjiptian pësoi një tronditje në kokë pas përplasjes me portierin e Newcastle, Martin Dubravka në pjesën e dytë të ndeshjes, e cila u fitua në mënyrë dramatike nga ‘Të Kuqtë’ 2-3.
Salah qëndroi në fushë për disa momente, përpara se të zëvendësohej me heroin Divock Origin, që shënoi golin e fitores, transmeton lajmi.net.
Por Klopp ka konfirmuar se ai nuk do të jetë i gatshëm për ndeshjen e nesërme: ‘’Salah nuk mund të luajë nesër. Ai po shkon mirë me punën e rikuperimit, por nuk luan nesër’’.
Liverpool pësoi humbje në ndeshjen e parë 3-0, ndërsa tashmë në ‘Anfield’ ka pak shpresa se do ketë ndryshim në rezultat, pasi edhe Roberto Firmino do të jetë në listën e mungesave. /Lajmi.net/